ദി മജീഷ്യൻ ഓഫ് ഫ്രാൻസ്

തന്റെ തലകൊണ്ട് ഫ്രാൻസിനെ ആദ്യമായി വേൾഡ്കപ്പ് ചാമ്പ്യന്മാരാക്കിയ ഒരാൾ 20 വർഷങ്ങൾക്കു ശേഷം ആ ടീമിലേക്ക് തന്നെ മടങ്ങിയെത്തിയിരിക്കുന്നു. ദിദിയർ ദെഷാംസ് രാജിവെച്ച ശേഷം ഫ്രാൻസിന്റെ പരിശീലക കുപ്പായം എടുത്തണിഞ്ഞവന്റെ പേര് സിനദിൻ സിദാൻ എന്നാണ്. പരിശീലക വേഷത്തിൽ സ്പാനിഷ് ക്ലബ്ബ് റയൽ മാഡ്രിഡിനായി മൂന്ന് വർഷങ്ങൾക്കുള്ളിൽ മൂന്ന് ചാമ്പ്യൻസ് ലീഗ് കിരീടങ്ങൾ നേടിക്കൊടുത്ത അനുഭവസമ്പത്തുമായാണ് അയാൾ പാരീസിലെത്തുന്നത്.

തെരുവിലെ സ്വപ്നങ്ങളിൽ നിന്ന് ലോകത്തിന്റെ നെറുകയിലേക്ക്

1972 ജൂൺ 23-ന് ഫ്രാൻസിലെ മാഴ്സയിലാണ് സിനദിൻ സിദാന്റെ ജനനം. നോർത്ത് ആഫ്രിക്കയിലെ അൾജീരിയയിൽ നിന്ന് മെച്ചപ്പെട്ട ജീവിതം തേടി ഫ്രാൻസിലേക്ക് കുടിയേറിയ ഇസ്മായിൽ സിദാന്റെയും മാലിക്കാ സിദാന്റെയും ഇളയ മകൻ. ദാരിദ്ര്യവും കുറ്റകൃത്യങ്ങളും നിറഞ്ഞ ലാകാസലാനെ തെരുവിലെ ഇടുങ്ങിയ ക്വാർട്ടേഴ്സിലാണ് ഏഴംഗ കുടുംബം കഴിഞ്ഞിരുന്നത്. ദാരിദ്ര്യം വേട്ടയാടിയപ്പോഴും ആ ബാലന്റെ കണ്ണുകൾ ഒരു തുകൽപന്തിൽ മാത്രം സ്വപ്നങ്ങൾ നെയ്തുകൂട്ടി.

വംശീയതയ്ക്ക് കളിക്കളത്തിൽ നൽകിയ മറുപടി

കരിയറിന്റെ തുടക്കകാലത്ത് കുടിയേറ്റക്കാരൻ എന്ന പേരിൽ കടുത്ത വംശീയ അധിക്ഷേപങ്ങൾ സിദാൻ നേരിട്ടു. എന്നാൽ 1998 ലോകകപ്പ് ഫൈനലിൽ ബ്രസീലിനെതിരെ രണ്ട് ഗോളുകൾ നേടി ഫ്രാൻസിനെ ചാമ്പ്യന്മാരാക്കി, തനിക്കെതിരെ വംശീയത പടർത്തിയവർക്ക് അയാൾ മറുപടി നൽകി. കറുത്തവരും വെളുത്തവരും അറബ് വംശജരും ചേർന്ന ഫ്രഞ്ച് ടീം വംശീയതയ്ക്കെതിരെയുള്ള ഐക്യത്തിന്റെ പ്രതീകമായി മാറി.

പുതിയ ദൗത്യം

2006-ൽ ലോകകപ്പിന്റെ ഫൈനലിൽ ചുവപ്പ് കാർഡ് കണ്ടു പുറത്തായെങ്കിലും, ആ ടൂർണമെന്റിലെ മികച്ച താരത്തിനുള്ള ‘ഗോൾഡൻ ബോൾ’ നേടിയാണ് അദ്ദേഹം ബൂട്ട് അഴിച്ചുവെച്ചത്. ഇപ്പോൾ, താരസമ്പന്നമായ ഫ്രാൻസിനെ തന്റെ തന്ത്രങ്ങൾക്കൊണ്ട് വീണ്ടും ഉന്നതിയിലേക്ക് എത്തിക്കാൻ സിദാൻ എത്തുമ്പോൾ ഫുട്ബോൾ ലോകം വലിയ പ്രതീക്ഷയിലാണ്.

Content Highlight

Legendary footballer and mastermind Zinedine Zidane has returned to manage the French national team, succeeding Didier Deschamps. Rising from the challenging streets of Marseille to overcome severe racism and achieve legendary status as both a player and a three-time Champions League-winning manager with Real Madrid, Zidane now steps into the dugout to lead France’s new generation.